నల్లమలలో పురాతన నగరం? The Sensational Magazine

కర్నూలు, జూలై 3: దట్టమైన నల్లమల అటవీప్రాంతంలో ఒకప్పుడు నగరం ఉండేదన్న విషయం వెలుగులోకి వస్తోంది. సుమారు ఐదారు వందల సంవత్సరాల కిందట ఈ నగరం ఉండి ఉంటుందని అక్కడి చెంచుల ద్వారా తెలుస్తోంది. కర్నూలు ఆత్మకూరు సమీపంలోని బైర్లూటి నుంచి కాలినడకన శ్రీశైలం వెళ్లే దారిలో నాగలూటి వీరభద్రస్వామి ఆలయం ఉంది. ఆ ఆలయానికి కొద్దిదూరంలో ముర్తుజావలి దర్గా అనే ప్రార్థనా మందిరం కూడా ఉంది. ఈ రెండింటికి దగ్గరలో కొంతదూరం కాలినడకన వెళ్తే ఒక బురుజు (కోట), శిథిలమైన కోటగోడలు కనిపిస్తున్నాయి. ఈ గోడలు, బురుజులను బట్టి ఇక్కడ పురాతన కాలంలో ఏదో నగరం ఉండి ఉంటుందని భావిస్తున్నారు. అంతేగాక అదేప్రాంతంలో భూమిలో కూరుకుపోయి ఉన్న కాళికామాత విగ్రహం కనిపిస్తోంది. తలమాత్రం బయటకు వచ్చి ఉండటం గమనార్హం. గతంలో ఇవి కనిపించేవి కావని గత ఏడాది కురిసిన అతి భారీ వర్షాలతో అక్కడఉన్న మట్టి కొట్టుకుపోయి ఇవి కనిపిస్తున్నట్లు అక్కడి చెంచుల ద్వారా తెలుస్తోంది. ఇక్కడ సిద్ధాపురం అనే ఒక నగరం ఉండేదని తమ పెద్దలు చెప్పేవారని వారు పేర్కొంటున్నారు. ఇందుకు సంబంధించిన కొన్ని గ్రంథాలు కూడా ఉండేవని, అయితే ప్రభుత్వం తమను అడవి నుంచి బయటకు తరలించే సమయంలో ఇవి ఎక్కడో పోయాయని వారంటున్నారు. కాళికామాత విగ్రహం ఉన్న స్థలానికి సమీపంలో గుర్తుతెలియని బాషలో శాసనం ఉంది. దీన్ని క్రోడీకరిస్తే ఇంకా విలువైన ఆధారాలు లభ్యంకావచ్చని అంచనా వేస్తున్నారు. కాగా ఇక్కడి కోటగోడలకు సంబంధించిన రాళ్లనే 110 ఏళ్ల క్రితం దొంగల పునరావాసం కోసం నిర్మించిన సిద్ధాపురం చెరువు రివిట్‌మెంటుకు వాడారని ఆ గ్రామస్థులు వెల్లడిస్తున్నారు. దీని కారణంగానే బురుజు మొండిగా కనిపిస్తోందని వారంటున్నారు. పాత నగరమైన సిద్ధాపురం పేరునే తమ గ్రామానికి అప్పటి అధికారులు నిర్ణయించారని వెల్లడిస్తున్నారు. బ్రిటిష్ హయాంలో కొన్ని గ్రంథాలు, శాసనాలు లభించాయని, వాటిని వారు ఎక్కడ పెట్టారో తెలియదని పేర్కొంటున్నారు. కాగా పురాతన నగరంలో కేవలం దేవతలకు సంబంధించిన ఆలయాలు మాత్రమే ఉండేవని ఆ ప్రాంతీయులు చెప్పుకుంటున్నారు. అంతేగాక ఇపుడు వెలుగోడుగా వెలుగొందుతున్న మేజర్ గ్రామం స్థానంలో నాడు వేశ్యావాటిక ఉండేదని, అక్కడికి సమీపంలోనే ఏనుగుల మంద ఉండేదని దానే్న ‘కరివెన’గా పిలుస్తున్నారని, ఇపుడు పట్టణంగా వెలుగొందుతున్న ఆత్మకూరు ఆనాడు దట్టమైన అటవీ ప్రాంతమని తెలుస్తోంది. ఈ ఆధారాలను బట్టి పురావస్తు శాఖ అధికారులు తవ్వకాలు జరిపితే మరిన్ని విషయాలు వెలుగులోకి వచ్చే అవకాశం ఉన్నట్లు ప్రజలు భావిస్తున్నారు. పురాతన నగరం గురించి తెలుసుకున్న పురావస్తుశాఖ అధికారులు సైతం తవ్వకాలు జరిపేందుకు సిద్ధపడినా నల్లమల అడవి పులుల అభయారణ్యంగా గుర్తించనది కావడంతో కేంద్ర ప్రభుత్వం అనుమతిస్తే తప్ప తవ్వకాలు జరపడానికి వీలుకాదని అంటున్నారు.
ఆంధ్రభూమి దినపత్రిక సౌజన్యంతో....@ అహ్మద్ చౌదరి

> మరిన్ని విషయాలకొరకు భారదేశ చరిత్ర క్లిక్ చేయండి

Labels